"Iyo lah soak aki urang awak kini Mak Tukang?"
"Ma wakden tau."
" Wak baco di online, lah banyak soak, indak mamikian kemajuan lai, tapi sanang kikiro-e ngecek politik, " kecek Yuang Tandan.
" Kok itu, mungkin, " jawak Mak Tukang.
" Tunggu lu, jan asa tuduah se, rusak nagari dek angku mah Tandan. " Disemba sakali dek Malin Pukek.
"Lin, jadi baa, jan main simbek se, kaluaanlah alasan Malin tu."
"Kecek angku diskusi apak-apak di kantua, ko lapau pasa ko," kecek Malin Pukek, sambia mamasan teh talua.
"Pagi-pagi ko bae teh talua lu," kecek Malin.
"Mantap bia barisi aki tu liak," kecak nan punyo lapau, Mak Kayo.
"Tapi, manuruik kito memang soak aki urang awak ko, kalau wak caliak di bidang politik, bidang lain den ndak tau," kato Yuang Tandan.
"Iyo manciracau se, indak manggadangan aie stek alah juo doh," kecek Kari Mudiak nan sajak tadi mengulek pisang goreng.
"Cepat terharu urang awak saya lihat, kami di Jawa tak begitu," kecek laki si Ros, nan urang Jawa. Lah pandai lo inyo duduak pagi-pagi di lapau. Namoe antah sia tapi urang kampuang ma imbau jo Mas Jawa.
"Mas Jawa hati-hati ngecek, banyak mato-mato siko," kato Malin.
"Saya kan hanya melihat apa yang saya sampaikan, ee terbalik saya hanya menyampaikan apa yang saya lihat," kata Mas Jawa.
"Mengecek se sumando nan surang ko, beko dipilin pusek dek rang rumah baru tau."
"Apa tuh saya tidak mengerti," katoe.
"Aja stek Kari mando angku ko." Kecek Mak Tukang.
Lapau Pasa sapagi rami, mengulek pisang goreng, menyosoh kacang padi, roti sarkana. Maisok tantu sajo kopi jo teh talua ndak ketinggalan.
"Jadi baa aki soak ko?" Mak Tukang batanyo liak.
"Alah tu, beko kanai demo lo, urang awak ko panyingguang, nan jaleh awak hebat. Itu nan pantiang, bodoh gai ndak baa doh, asa diakui ebat," kecek Malin.
"Oh mantun, jadih menahan." kecek Mak Tukang. Inyo sagiro pai.
"Rang lapau catat lu, den kabau kang, sanjo beko den bayia." Inyo malincua pai. *
0 Comments